bruschetta

Það er fátt betra en gott bruschetta, sérstaklega með einu rauðvínsglasi! 

Hér eru nokkrar girnilegar uppskriftir sem gaman væri að prófa!

__________

A delicious bruschetta with a glass of red wine is the perfect combination. 

Here are a few simple recipes that would be fun to try.

1 | 2 | 3 | 4

oreos

Ég er mikill aðdáandi oreo kex, sérstaklega þegar kemur að ís og ostakökum ;) Nýlega var mér bent á vefsíðu sem hafði tekið saman hrúgu af oreo-uppskriftum. Himnaríki! Ég tók hér saman nokkrar uppskriftir sem mér finnst líta einstaklega vel út og vonandi finn ég tíma til að skella í eina uppskrift bráðlega. Held það sé bara nauðsynlegt! :)

__________

I'm a huge oreo fan, especially related to icecream and cheesecakes (yummy!) ;) Here are a few oreo recipes that I'd like to try, they look soooo good! :)

1. Cookies and Cream Oreo Bark | 2. Oreo and Peanut Butter Layered Baby Lattice Pies | 3. Gooey Cookies & Cream Bars | 4. Man-Whore Bars | 5. Oreo Poke Cake | 6. Cookies and Cream Brownies | 7. Cookies and Cream Pudding | 8. Oreo Ice Cream Truffles | 9. Cookies and Cream Cookies

hafrakossar

Mynd: Tanja Dögg // Djörfung

Ég ákvað loksins að prófa hafrakossa - uppskriftina fékk ég hjá Eldhúsperlum :) Hafrakossar eru rosalega gómsætir og mér finnst þeir minna á eitthvað sem amma myndi baka, það er eitthvað gamaldags við þá! Uppskriftin er einföld og tekur alls ekki langan tíma.

Kökurnar: 250 gr mjúkt smjör - 2 dl púðursykur - 1 dl sykur - 1 egg - 1 og 1/2 tsk vanilludropar - 3 dl hveiti - 1 tsk matarsódi - 1/2 tsk salt - 1/2 tsk kanill - 7 dl haframjöl.

Byrjið á því að hita ofninn í 170°C - ef þið ætlið að setja fleiri en eina plötu inn er sett á blástur. Hrærið sykur og smjör þangað til blandan er orðin létt og ljós. Bætið egginu og vanilludropum út í og hrærið saman. Í annari skál er hveiti, matarsóda, salti og kanil blandað saman og bætt svo við smjörblönduna. Að lokum er haframjölinu bætt við og öllu blandað lauslega saman. Gott er að nota tvær teskeiðar til að setja deigið á plötuna. Ég mæli með að hafa kökurnar ekki of stórar og reyna að ýta deiginu aðeins niður svo kökurnar verði ekki of þykkar. Kökurnar eru bakaðar í 8 - 10 mínútur og gott er að kæla þær á grind.

Kremið: 150 gr smjör - 250 gr flórsykur - 2 msk rjómi - 1/2 tsk vanilludropar.

Öllum hráefnum er blandað saman í skál og þeytt vel saman. Kremið er sett á þegar kökurnar hafa kólnað og þá er gott að nota kremsprautu til að setja kremið á milli (en einnig er hægt að nota bara teskeið).

__________

I made these delicious oatmeal buttercream pies earlier this week - the recipe can be found here. Enjoy :)

Rice Krispies kaka

Fyrir nokkru síðan ákvað ég að prófa að gera mína eigin útgáfa af hinni gómsætu Rice Krispies köku. Kakan heppnaðist mjög vel og var mjög bragðgóð. 

Kakan: 150-200 g súkkulaði (eftir smekk) - 60 smjör - 4 msk sýróp - 100 g Rice Krispies.

Þetta gerist varla auðveldara! Byrjað er að bræða smjörið við vægan hita og því næst er súkkulaðið sett út í og látið bráðna. Svo er sýrópinu bætt við og að lokum er Rice Krispies sett út í (hér er gott að hafa rúmgóðan pott svo það sé pláss fyrir allt!) Blandan er sett í hringlaga form og inn í ísskáp í u.þ.b. 15 mín.

Þá er bara að byrja á karamellusósunni:

Karamellusósan: 60 g smjör - 60 g púðursykur - 1/4 tsk vanilludropar - 1-2 msk rjómi.

Öll hráefni eru sett í pott við háan hita og hrært í þangað til að úr verður karamellublanda. Gott er að kæla karamellusósuna töluvert áður en hún er sett ofan á rjómann, annars er hætta á að hann "bráðni." Nú er gott að þeyta rjómann (tæplega 1/4L) sem fer ofan á kökuna.

Næst er kakan tekin úr ísskápinum og rjóminn smurður ofan á.  Best er svo að setja kökuna í ísskáp í um 45 mín. Þá er hún tilbúin! Gangi ykkur vel :-)

Skúffukaka

Mynd: Tanja Dögg // Djörfung

Ég gerði þessa girnilegu köku með bestu vinkonu minni þegar ég heimsótti hana til Danmerkur. Kakan heppnaðist rosalega vel og var dásamlega bragðgóð og við nutum hennar með köldu glasi af mjólk. Þetta er hin dæmigerða skúffukaka sem allir hafa smakkað:

Kakan: 5 dl hveiti - 2 dl sykur - 2 dl púðursykur - 1 dl kakó - 3 tsk vanillusykur - 1 tsk matarsódi - 1 tsk lyftiduft - 170 gr brætt smjörlíki - 2 egg -2 1/2 dl mjólk - 1/2 dl heitt vatn.

Byrjað er á að bræða smjörið. Öll hráefnin, nema vökvinn, eru sett í skál og hrærð saman. Því næst er heita vatninu, smjörinu og mjólkinni bætt rólega út í deigið og eggjunum bætt við. Deiginu er því næst hellt í smurt bökunarform (ca. 25 x 35 cm) og bakað við 200 °C í rúmlega 20-30 mínútur (mismunandi eftir ofnum).

Kremið: 100 g mjúkt smjörlíki - 1 egg - 1 tsk vanilludropar - 1 msk kaffi (ekki nauðsynlegt) - 3 msk kakó - flórsykur eftir þörfum.

Öllu blandað saman í skál og flórsykri bætt við eftir þörfum. Það tók smá tíma hjá okkur að finna rétt magn af flórsykri, þannig gott er að byrja á að setja lítið og bæta svo við ef þið viljið hafa kremið sætara. Svo skemmir auðvitað ekki fyrir að hafa kókosmjöl ofan á kökunni.

Kakan er svo að sjálfsögðu borin fram með ískaldri mjólk, namm! Njótið :)

Oreo cheesecake

Mynd: Eva Laufey

Ég gerði guðdómlega köku í gær - Oreo ostaköku. Ef ykkur finnst oreo kex gott þá er þetta eitthvað fyrir ykkur! Eftir að hafa skoðað nokkrar uppskriftir á netinu ákvað ég að prófa að búa til mína eigin og varð ekki svikin. Þessi kaka gæti ekki verið einfaldari, í henni eru aðeins 5 hráefni: Philadelphia ostur, flórsykur, 1-2 oreo kex pakkar (16 kex í pakka), rjómi og smjörvi.

Botn: 11-15 oreo kex - 1/5 dl smjörvi.

Fylling: 1 askja hreinn Philadelphia rjómaostur - 1/4 L rjómi - 2 dl flórsykur - 5-10 oreo kex.

Þessi uppskrift er frekar lítil (fyrir 4-5 manneskjur) en hægt er að tvöfalda hana.

Byrjað er á að mylja oreo kexkökur og setja í botn á formi. Því næst er smjörvi bræddur og honum hellt yfir muldu kexkökurnar. Þá er botninn tilbúinn! Næst er flórsykri og rjómaosti blandað saman í skál og rjóminn þeyttur í annarri skál. Oreo kexkökurnar eru svo muldar niður og settar út í rjómann. Að lokum er rjómanum blandað saman við flórsykurinn og rjómaostinn. 

Ég keypti einn pakka af oreo kexkökum, en mæli með að kaupa tvo. Þá er hægt að skreyta kökuna að ofan, en ég var ekki með nóg af kexi í það. Þannig ef þið viljið EKKI skreyta kökuna þá er nóg að hafa einn pakka af oreo kexi. 

Verði ykkur að góðu! :-)

Skúffukaka með marengskremi

Ég er lengi búin að ætla að prófa marengskrem á köku. Ég smakkaði það síðast þegar ég var barn og rakst nýlega á uppskrift að því. Kakan er langbest nýbökuð með kreminu - ég held reyndar að hún sé ekki lengi að klárast þar sem kremið hreinlega bráðnar í munninum ;-) Ég hvet ykkur til að prófa, þið verðið ekki svikin! (Varúð: Aðeins fyrir mikla sælkera).

Kakan: 5 dl hveiti - 2 dl sykur - 2 dl púðursykur - 1 dl kakó - 3 tsk vanillusykur - 1 tsk matarsódi - 1 tsk lyftiduft - 170 gr brætt smjörlíki - 2 egg -2 1/2 dl mjólk - 1/2 dl heitt vatn.

Byrjað er á að bræða smjörið. Öll hráefnin, nema vökvinn eru sett í skál og hrærð saman. Því næst er heita vatninu og mjólkinni bætt rólega út í deigið. Deiginu er því næst hellt í smurt bökunarform (ca. 25 x 35 cm) og bakað við 200 °C í rúmlega 20-30 mínútur (mismunandi eftir ofnum).

Kremið: 3,5 dl sykur - 1 1/2 tsk agave sýróp (eða annað sýróp) - 2 tsk kalt vatn - 5 stórar eggjahvítur.

Öll hráefnin eru sett í skál og blandað saman með sleif. Næst er vatn sett í pott (u.þ.b. 7-10 dl) sem þarf að vera nógu stór til að rúma skálina. Þegar vatnið er byrjað að hitna er skálin sett í pottinn og hrært er í blöndunni. Mikilvægt er að blandan sjóði ekki. Hrært er í blöndunni þar til allur sykurinn er uppleystur og er þá skálin fjarlægð úr pottinum. Því næst er kremið hrært með hrærivél í u.þ.b. 12 - 15 mínútur. Svo er hægt að lita kremið með matarlit ef áhugi er fyrir því.

Sjónvarpskaka

Fyrir þá sem hafa ekki smakkað þessa þá mæli ég með henni! Þetta er ein af mínum uppáhalds kökum og hún er alls ekki flókin.

Kakan: 2 egg - 1,5 dl sykur - 1,5 dl hveiti - 1 tsk lyftiduft - 1/4 tsk salt - 1 tsk vanilludropar - 1 dl heit mjólk - 1 msk brætt smjörlíki.

Byrjað er á að þeyta sykur og egg vel saman. Því næst er þurrefninu hrært varlega saman við (mæli með að sigta þurrefnin ofan í skálina). Að lokum er smjörlíkið brætt og mjólkin hituð (ég set þetta saman í pott) og blandað rólega saman við blönduna. Bökunartíminn er u.þ.b. 10 mínútur við 180°C.

Kókosmjölblanda: 2 msk mjólk - 3 msk smjörlíki (ég nota stundum smjörva) - 4 msk kókosmjöl - 5 msk púðursykur.

Á meðan kakan er í ofninum er kókosmjölblandan búin til. Öllu er blandað saman í potti og suðan látin koma upp. Þegar kakan er búin að bakast í 10 mín er hún tekin úr ofninum og kókosmjölblöndunni er hellt yfir. Kakan er svo sett aftur í ofninn í u.þ.b. 5 mínútur.

Hrökkkex

Ég og mamma ákváðum að prófa að búa til hrökkkex í dag. Niðurstaðan var vonum framar þar sem kexið hreinlega bráðnaði í munninum. Þetta var ótrúlega fljótlegt og einfalt og krafðist ekki mikillar fyrirhafnar. Undirbúningurinn tók um 10 mínútur og bökunartíminn var u.þ.b. 15 mínútur.

Innihald: 

1 dl hörfræ - 1 dl sólblómafræ - 1 dl sesamfræ - 1 dl graskersfræ - 1 dl haframjöl

4 dl spelt - 3 tsk Maldon salt - 2 dl vatn - 1 1/4 dl olía

Byrjað er á að blanda þurrefnunum saman í skál. Því næst er olíu og vatni bætt við og öllu hrært saman með sleif.

Deiginu er skipt jafnt í þrjá hluta. Deigið er svo flatt út með því leggja bökunarpappír yfir og undir deigið. Mikilvægt er að fletja deigið mjög þunnt. Efri bökunarpappírinn er fjarlægður og deigið skorið niður bita (mismunandi hvaða stærð fólk vill, gott að prófa sig áfram). Við ákváðum að setja rifinn ost ofan á deigið, bæði venjulegan og parmesan. Að lokum er deigið sett á bökunarplötu og bakað við 200°C í u.þ.b. 13-15 mínútur.

Nú má byrja að smakka! Verði ykkur að góðu :)

Sumardrykkur

Í gær bjó ég til gómsætan sumardrykk í sólinni. Það er algjört möst að hafa svalandi drykk við hendina þegar veðrið leikur svona við mann :) Ég notaði uppskrift sem Tinna vinkona mín kenndi mér. Ég breytti henni þó aðeins og niðurstaðan var mjög góð. Það sem þú þarft er Super Berries djús frá Berry Company, sódavatn og lime.

Glasið er fyllt með u.þ.b. helming af sódavatni og helming af djús. Það er matsatriði hversu mikinn djús fólk vill hafa, þannig endilega prófa sig áfram. Að lokum er lime kreist úti og klökum bætt við. Næst er bara að smakka :)